DUVI. Diario da Universidade de Vigo
Inicio arrow Campus de Pontevedra
Venres, 26 de maio do 2017

Celebrarase no Mosteiro de San Xoán de Poio entre o 6 e 8 de xuño

O I Congreso de Historia do Turismo achegará novos datos sobre os inicios deste sector en España

Coordinado por Rafael Vallejo e Carlos Larrinaga, centra a súa análise nas primeiras décadas do século XX


ImageUn estudo sobre a evolución e as características das axencias de viaxes do primeiro terzo do século XX, estatísticas sobre a demanda turística ou datos comparativos da situación na que se atopaba a industria turística en España e noutros países nas primeiras décadas do pasado século. Estes son algúns dos novos datos que permitirán afondar en como nestes anos se produciu a conformación dunha industria turística en España no I Congreso de Historia do Turismo, que se desenvolverá no Mosteiro de San Xoán de Poio entre o 6 e o 8 de xuño, baixo a coordinación dos profesores Rafael Vallejo e Carlos Larrinaga.
Venres, 26 de maio do 2017

Un taller achega ao alumnado aos procesos de selección persoal das institucións comunitarias

A Unión Europea como oportunidade laboral

Da man dun funcionario da Comisión Europea, realizaron unha simulación de probas de acceso


ImageMáis de 40.000 persoas traballan nas diferentes institucións, órganos e axencias vinculadas á Unión Europea. Mais os organismos comunitarios non sempre son percibidos como unha opción laboral polo alumnado, como recoñece Celso Cancela, titular da Cátedra Jean Monnet Understanding the UE in the 21st Century, na que se enmarca o taller sobre oportunidades laborais na UE que ao longo deste mes de maio se desenvolve en CCSS e da Comunicación. “O curso pretende achegalos a opcións profesionais que non son precisamente menores e que vexan que, entre aspas, están máis preto do que parecen”, sinala o responsable desta actividade.
Xoves, 25 de maio do 2017

Os proxectos de tres estudantes e un egresado foron os seleccionados polo xurado

Belas Artes copa os premios do certame Novos Valores da Deputación

Yolanda Ríos, Mariluz Feijóo, Aitor Victor Fernández e Borja Guerrero son os catro gañadores


ImageAs investigadoras da Facultade de Belas Artes Yolanda Ríos e Mariluz Feijóo, o estudante de grao Aitor Víctor Fernández e o egresado Borja Guerrero son as autoras e autores das obras gañadoras do certame Novos Valores 2017, que promove a Deputación de Pontevedra. Así o vén de determinar o xurado destes premios, nunha reunión na que as súas obras foron escollidas de entre as 37 obras seleccionadas para a exposición que terá lugar no Sexto Edificio do Museo de Pontevedra entre o 3 de agosto e o 17 de setembro. As e os artistas seleccionados serán recoñecidos coa concesión dunha bolsa de estudos e a oportunidade de expoñer no Museo de Pontevedra os seus proxectos.
Xoves, 25 de maio do 2017

Trátase dun requisito previo para poder acceder á titulación

As probas de acceso a Ciencias da Actividade Física e do Deporte reúnen 150 estudantes

O 85% dos candidatos e candidatas obtiveron a cualificación de apto


ImageAínda faltan dúas semanas para que o alumnado que o vindeiro curso iniciará os seus estudos universitarios teña que enfrontarse as probas de Avaliación do Bacharelato para o Acceso á Universidade (ABAU), mais para aquelas e aqueles que teñen entre as súas opcións o grao de Ciencias de Actividade Física e do Deporte, o primeiro paso para converterse en estudantes do campus pontevedrés o vindeiro curso comezaba este xoves. Facíao coa celebración das probas físicas de acceso a esta titulación, que reuniron 150 estudantes en Ciencias da Educación e do Deporte, na primeira das dúas convocatorias ás que poderán concorrer os 190 inscritos.
Mércores, 24 de maio do 2017

A Universidade é unha das 32 institucións non británicas convidadas á Graduate Fashion Week

Esdemga, seleccionada por primeira vez para participar nun encontro internacional de escolas de moda en Londres

A titulación estará representada neste evento pola colección que Aida Mosquera presentou en Debut 2016


ImageEntre o 4 e o 7 de xuño, representantes de máis dunha vintena de universidades e escolas de moda do Reino Unido amosarán o traballos dos seus novos titulados e tituladas nunha nova edición da Graduate Fashion Week, un evento que, na súa xornada de clausura, amosará tamén os proxectos xurdidos en 32 centros formativos de Europa, Asia e América. Entre eles estarán por primeira vez os Estudos Superiores de Deseño Téxtil e Moda de Galiza (Esdemga), que veñen de ser convidados a participar neste “importante escaparate” que durante catro días reúne no Truma Brewery londinense ao persoal de recursos humanos das principais firmas de moda, como sinala a directora da titulación que se imparte na Facultade de Belas Artes, Lola Dopico, que salienta tamén a oportunidade que esta invitación supón á hora de “traballar conexións internacionais” para o máster en Deseño e Dirección Creativa de Moda, que comezará a impartirse o vindeiro curso.
Mércores, 24 de maio do 2017

Coa conferencia que o contralmirante Manuel Romasanta ofrece este xoves na Escola Naval Militar

A Cátedra Álvarez-Ossorio rememora a evolución do ensino naval

O relatorio enmárcase nos actos do 300 aniversario da Real Compañía de Guardiamarinas


ImageNun ano marcado pola conmemoración do 300 aniversario da creación da Real Compañía de Guardiamarinas, a Cátedra Álvarez-Ossorio, que a Escola Naval Militar de Marín promove xunto coa Universidade de Vigo, continua afondando na súa historia e traxectoria. Se o 10 de maio o capitán de navío José María Blanco abordou na Facultade de Ciencias Sociais e da Comunicación os inicios da compañía, este xoves 25 será o contralmirante e almirante director de Ensinanza Naval, Manuel Romasanta Pavón, o responsable de afondar, nun novo relatorio, na evolución desta formación ao longo dos séculos.
<< Inicio < Ant. 1 2 3 4 5 6 7 8 9 10 Seg. > Remate >>
Resultados 1 - 6 de 3230

Duvi. Diario da Universidade de Vigo. | Contacta con nós